عمرو حسن
انا خفيت خلاص منك
انا خفيت خلاص منك
وبكره انساكي وكإنك
سحابة صيف مابتمطرش
انا والله ماباهزرش
انا شُفتك مع صحابك وماتهزتش
صحيح دمّعت دمع خفيف
لكني مسحتها بسرعة وعيني حتى ماتبلِّتش
مانيش سامع بلاك تيما عشان خاطرك
ومش هاشرب ليمون نعناع عشان خاطرك
انا تذكرتي مش لايقة على قطرك
ولا قلمي عرف ينزل على سطرك
انا غلطان عشان م الأول اخترتك
ودخّلتك ف تفاصيلي
كفاية شربتي من نيلي وانا عطشان
وحلِّفتك عشر مرات على القرآن
تراعي ربنا فيا وتملى الدنيا حواليا
حضنت ايديكي ف ايديا وانا سكران
وكنت باوفّر الضحكة عشان انتي اللي تبتسمي
وصلت لمرحلة ممكن اسيبلك حتة من جسمي
حلفتيلي بإنك بكره تبقيلي وقولتي هتحملي اسمي
وايه فاضل سوى ذكرى
ف اخر كرسي ف السيما ( شمال ع الطرف )
وبوسة وسلسلة قديمة عليها حرف
وشارع شفنا فيه بتارين
وضحكة لما باتكلم
وانا ألدغ ف حرف السين
ودكة صبحت انا فيها لوحدي حزين
بادوّر ف اللي فات كله وباحسبها
ده ربك لما سببها حكم برضه ماتكملشي
ويمكن صمتي فيه حكمة عشان فيه حاجت ماتتقالشي
وبكره هامسحك دمعة اذا نزلت ف يوم ع الخد
يا أكبر حزن له فرحة
ياهزاراية واخدها بجد
انا مفارق ومش فارق
مافيش فُرقة تموِّت حد .
ليست هناك تعليقات:
إرسال تعليق